Berbatov á leið til Arsenal?

Enska götublaðið The Sun greinir frá því að Arsene Wenger sé á góðri leið með að festa kaup á Dimitar Berbatov, sóknarmanni Fulham.

Wenger hefur verið að leita að leiðum til að styrkja sóknarlínu liðsins og ekki bætti úr skák að Nicklas Bendtner meiddist þegar hann skoraði fyrra markið í 2-0 sigri Arsenal á Cardiff í gær.

Berbatov tryggði Fulham 2-1 sigur á West Ham í gær og hefur skorað fimm mörk á tímabilinu. Hann lék áður með Tottenham, erkifjendum Arsenal, og Manchester United.

Berbatov er 32 ára gamall og fullyrðir The Sun að Arsenal muni greiða um 380 milljónir króna fyrir kappann.

Loic Remy, sóknarmaður QPR, er einnig orðaður við Arsenal í enskum fjölmiðlum í dag en hann leikur nú sem lánsmaður hjá Newcastle.

Mark Berbatov má sjá í spilaranum hér fyrir ofan.