Holloway kominn með nýja vinnu

Ian Holloway hefur verið kynntur til leiks sem nýr knattspyrnustjóri enska knattspyrnufélagsins Millwall. Sky Sports greinir frá þessu.

Holloway hefur samið við Millwall til sumarsins 2016 og stýrir liðinu í fyrsta skipti er liðið sækir Huddersfield heim í Championship-deildinni á laugardag.

Stjórinn fimmtugi var látinn taka pokann sinn hjá Crystal Palace í haust eftir að hafa komið liðinu upp í ensku úrvalsdeildina. Hann tekur við starfinu hjá Millwall af Steve Lomas sem fékk brottvikningu í síðbúna jólagjöf á annan dag jóla.