Oscar hjá Chelsea til ársins 2019

Brasilíumaðurinn Oscar er búinn að skrifa undir nýjan fimm ára samning við enska úrvalsdeildarliðið Chelsea.

Oscar, sem er 23 ára, gekk til liðs við Chelsea frá Internacional í heimalandinu sumarið 2012, en talið er að kaupverðið hafi verið um 25 milljónir punda.

Í samtali við heimasíðu Chelsea kvaðst Oscar sáttur með þessa niðurstöðu:

„Ég er svo ánægður því ég elska að spila fyrir Chelsea og búa á Englandi. Ég hef notið þess að spila fyrir Chelsea undanfarin tvö ár og nú bætast fimm við, svo ég er mjög sáttur.“

Oscar hefur skorað þrjú mörk og gefið tvær stoðsendingar fyrir Chelsea í úrvalsdeildinni í vetur, en liðið er með fjögurra stiga forskot á toppi deildarinnar þegar 11 umferðum er lokið.