Stuðningsmenn Liverpool berjast gegn háu miðaverði hjá Arsenal

Stuðningsmenn Liverpool hafa miklar áhyggjur af dýrum miðum á bikarleik Arsenal og Liverpool sem fer fram á Emirates-leikvanginum í London. Liðin drógust saman í átta liða úrslitum keppninnar og nú hafa meðlimir Spirit of Shankly skorað á forráðamenn Arsenal að hækka ekki miðaverðið á leikinn.

Meðlimir stuðningsmannaklúbbsins Spirit of Shankly óttast það að miðarnir á leikinn gætu kostað 93 pund eða tæplega 18 þúsund íslenskar krónur. Þetta kemur fram í frétt á Guardian.

Stuðningmenn Liverpool borguðu 62 pund inn á deildarleik liðanna á Emirates-leikvanginum fyrr á þessu tímabili en sá leikur fór fram á laugardagskvöldi. Miði á leiki í A-flokki er mun dýrari og menn innan Spirit of Shankly klúbbsins óttast það að leikur Arsenal og Liverpool verði settur í A-flokk.

Stuðningsmenn Coventry borguðu "aðeins" 25,50 pund inna á bikarleik Arsenal og Coventry á dögunum, 4900 íslenskar krónur, og í bréfi meðlima Spirit of Shankly klúbbsins til forráðamanna Arsenal var biðlað til að miðaverðið haldist óbreytt.

Stuðningsmenn Liverpool hafa þurft að borga 72 prósent meira inn á útileiki sína á tímabilinu heldur en stuðningsmenn nágrannaliðsins Everton. Það þykir mönnum þar á bæ skiljanlega ekki sanngjarnt.