Juncker tilnefndur nýr forseti framkvæmdastjórnar ESB

Jean Claude Juncker, fyrrum forsætisráðherra Lúxemborgar, var í dag tilnefndur forseti framkvæmdastjórnar Evrópusambandsins með yfirburðum. 26 af 28 fulltrúum aðildarþjóða sambandsins greiddu atkvæði með Juncker.

Þetta kemur fram á vef BBC. Davið Cameron, forsætisráðherra Bretlands, hefur látið það í ljós undanfarið að hann vildi alls ekki sjá Juncker taka við embættinu. Cameron og Viktor Obran, forsætisráðherra Ungverjalands, voru þeir einu sem greiddu ekki atkvæði með Juncker.

„Þetta er slæmur dagur fyrir Evrópu,“ sagði Cameron þegar úrslitin lágu fyrir. Breski leiðtoginn lítur svo á að Juncker muni efla enn meira völd framkvæmdastjórnarinnar í Brussel og leggjast gegn umbótum innan sambandsins. Forseti framkvæmdastjórnarinnar er alla jafna kjörinn einróma en vegna mótbára Cameron var gripið til kosningar.

„Allt þetta ferli hefur ýtt undir þá skoðun mína að breytingar þurfa að eiga sér stað í Evrópusambandinu,“ sagði Cameron.