Eggert rifjar upp árin hjá West Ham

Eggert Magnússon er í ítarlegu viðtali sem birtist á heimasíðu knattspyrnutímaritsins Four Four Two í vikunni.

Fótbolti.net greindi frá viðtalinu á sinni síðu en Eggert segist þess fullviss að hlutirnir hefðu verið öðruvísi hjá West Ham hefði hann átt fullan eignarhlut í félaginu á sínum tíma.

Björgólfur Guðmundsson átti langstærstan hlut í West Ham en fékk Eggert í lið með sér. Eggert, fyrrum formaður KSÍ, var gerður að stjórnarformanni félagsins.

Þeir tóku við félaginu í nóvember 2006 en ævintýrið féll um sjálft sig eftir bankahrunið á Íslandi á sínum tíma. David Sullivan og David Gold tóku félagið yfir árið 2010 og gagnrýndu forvera sína harkalega.

„Það virðist algengt að nýtt fólk sjái ástæðu til að gagnrýna þá sem á undan voru. Það er svipað með knattspyrnustjóra - það fyrsta sem þeir segja er að leikmennirnir eru ekki í standi til að spila knattspyrnu,“ sagði Eggert í viðtalinu sem má lesa hér.

„Það hefur margt gott gerst hjá West Ham síðust ár en líka mörg mistök gerð. Þannig er það í lífinu og í fótboltanum. Maður tekur ákvarðanir - sumar eru réttar og sumar rangar. Ef maður tekur aldrei ákvarðanir þá gerist heldur aldrei neitt.“

Það er komið víða við í viðtalinu og rifjað upp þegar Björgólfur bað Eggert um að taka þátt í West Ham-ævintýrinu með sér. Hann segist hafa blendnar tilfinningar gagnvart þessum árum.

„Ef ég hefði átt félagið einn hefði ég staðið allt öðruvísi að hlutunum. En ég hefði kannski aldrei farið af stað í þetta hefði ég vitað þá það sem ég veit nú,“ sagði Eggert Magnússon.