Arsenal náði hefndum gegn Liverpool

Everton koma til með að þurfa að leggja leið sína til Lundúna í átta liða úrslitum ensku bikarkeppninnar eftir sigur Arsenal gegn Liverpool í dag.

Arsenal komst yfir með marki Alex Oxlade-Chamberlain á sautjándu mínútu eftir mikinn darraðadans í vítateig Liverpool.

Daniel Sturridge fékk tvo góða möguleika á því að koma Liverpool yfir á fyrstu fimm mínútum leiksins en fann ekki leiðina inn í markið.

Arsenal kom sér svo í þægilega stöðu þegar þeir unnu boltann á miðjum vellinum í byrjun síðari hálfleiks. Oxlade-Chamberlain geystist með knöttinn upp kantinn og sindi boltann svo út í teig á Lukas Podolski sem kláraði færið sitt gríðarlega vel.

Steven Gerrard minnkaði muninn á 63. mínútu úr vítaspyrnu eftir að Lukas Podolski braut á Luis Suarez.

Stuttu síðar komst Sturridge enn einu sinni einn gegn Fabianski í marki Arsenal en sá síðarnefndi gerði vel og stýrði Sturridge frá markinu.

Leikmenn Liverpool reyndu hvað þeir gátu að kreista fram jöfnunarmark og virkaði Arsenal-liðið nokkuð skelkað til að byrja með.

Eftir því sem á leið voru heimamenn öruggari með forskotið sitt og fóru að taka góðan tíma í allar aðgerðir sínar. Þannig náðu þeir að róa leikinn niður og klára hann.