Stóri Sam og Sturridge bestir í febrúar

Stóri Sam Allardyce, knattspyrnustjóri West Ham, var útnefndur stjóri mánaðarins fyrir febrúar í ensku úrvalsdeildinni en hann hafði betur í samkeppni við José Mourinho, Brendan Rodgers og SteveBruce.

Mikið var rætt og ritað um að starf Stóra Sams væri í hættu eftir afleitt gengi framan af tímabili en hann sneri genginu heldur betur við ásamt leikmönnum sínum í febrúar.

Eftir að ná markalausu jafntefli gegn Chelsea á Brúnni 29. janúar vann West Ham alla fjóra leiki sína í febrúar gegn Swansea, Aston Villa, Norwich og Southampton. West ham fékk ekki á sig mark í neinum leikjanna.

Þetta er í fimmta skiptið á ferli Allardyce sem hann er útnefndur stjóri mánaðarins en síðast hlaut hann viðurkenninguna í desember 2006 þegar hann stýrði Bolton.

Daniel Sturridge, framherji Liverpool, var svo útnefndur leikmaður mánaðarins í ensku úrvalsdeildinni en hann skoraði fimm mörk í fimm leikjum í febrúar.