Man varla eftir því að Man. Utd hafi fengið færi

Það var létt yfir stjóra Man. City, Manuel Pellegrini, eftir þægilegan 0-3 sigur á Man. Utd í kvöld.

"Við skoruðum þrjú mörk og fengum fleiri fín færi til þess að skora. Ég man ekki eftir því að Man. Utd hafi fengið gott færi í leiknum. Við ætluðum okkur þrjú stig strax frá upphafi," sagði Pellegrini.

"Fyrir mér skipti miklu máli að halda okkar marki hreinu. Við vitum vel að við getum alltaf skorað mörk. Við vorum mjög þéttir á báðum endum vallarins.

"Í byrjun tímabilsins er mikilvægt að vera klár með liðið sem maður vill hafa. Það þarf að spila svo marga leiki og nauðsynlegt að hafa marga framherja. Ég er gríðarlega ánægður með varnarleikinn og það er mjög gott jafnvægi í okkar liði þessa stundina."