Negredo, Dzeko og Aguero skoruðu allir i bikarsigri City

Manchester City er komið áfram í 4. umferð ensku bikarkeppninnar eftir 5-0 sigur á b-deildarliði Blackburn Rovers á Etihad-leikvanginum í kvöld í endurteknum leik í 3. umferðinni en liðin gerðu 1-1 jafntefli á heimavelli Blackburn.

Manchester City hefur boðið upp á mikla markaveislu Etihad-leikvanginum á þessu tímabili og liðið hefur nú skorað 64 mörk í 16 heimaleikjum á leiktíðinni.

Framherjarnir Álvaro Negredo, Edin Dzeko og Sergio Agüero komust allir á blað í kvöld. Álvaro Negredo skoraði tvö fyrstu mörkin og Sergio Agüero það fjórða aðeins mínútu eftir að hann kom inná sem varamaður fyrir Negredo.

Edin Dzeko skoraði síðan sitt annað mark undir lokin og innsiglaði sigurinn með sínu áttunda bikarmarki á leiktíðinni, tvö í bikarnum og sex í deildabikarnum. Hann hefur einnig lagt upp fjögur önnur mörk í þessum sex leikjum í bikarkeppnunum tveimur.

Sergio Agüero var að spila sinn fyrsta leik síðan að hann kom til baka eftir meiðsli sem höfðu haldið honum frá keppni síðan í sigurleik á Arsenal 14. desember. Argentínumaðurinn var ekki lengi að skora en allir framherjar City-liðsins eru sjóðheitir.

Álvaro Negredo kom Manchester City í 1-0 á lokamínútu fyrri hálfleiks eftir fyrirgjöf Fernandinho og bætti síðan öðru marki við á 47. mínútu eftir sendingu Aleksandar Kolarov. Negredo hefur nú skorað 23 mörk á sínu fyrsta tímabili með City.

Edin Dzeko skoraði þriðja markið á 67. mínútu og lagði síðan upp mark fyrir Sergio Aguero á 73. mínútu. Dzeko skoraði fimmta markið á 79. mínútu eftir sendingu Jesus Navas.

Manchester City mætir b-deildarliði Watford í 32 liða úrslitum ensku bikarkeppninnar.