Liverpool bauð 21 milljón punda í Brassa

BBC segir frá því í kvöld að enska úrvalsdeildarfélagið Liverpool hafi boðið 21 milljón enskra punda í brasilíska sóknarmanninn Diego Costa sem spilar með Atletico Madrid á Spáni.

Heimildir BBC-mann herma að þetta sé upphæðin sem dugi til að kaupa upp samninginn hjá leikmanninum en allir leikmenn á Spáni eru með slíka klausu í sínum samningum.

Diego Costa er 24 ára gamall og 188 sm á hæð en hann kom frá Valladolid árið 2010 og skoraði 10 mörk í spænsku úrvalsdeildinni á síðustu leiktíð. Hann var í láni hjá Rayo Vallecano tímabilið 2011-12.

Diego Costa lék sinn fyrsta landsleik í mars en hann gæti orðið þriðji Brasilíumaðurinn hjá Liverpool. Miðjumennirnir Lucas Leiva og Philippe Coutinho hafa báðir gert góða hluti á Anfield.

Áhugi Liverpool á Diego Costa er sagður ekkert tengdur því hvort Luis Suarez sé að fara frá félaginu eða ekki.