Gerrard: Liverpool verður að halda Luis Suarez

Steven Gerrard, fyrirliði Liverpool, segir að það sé nauðsynlegt fyrir félagið að halda Úrúgvæmanninum Luis Suarez innan sinna raða en Liverpool hafnaði 40 milljón punda tilboði Arsenal í leikmanninn á dögunum.

Ef að Liverpool kemst ekki hjá því að selja Luis Suarez þá vonast Gerrard eftir því að hann fari til Real Madrid eða Barcelona frekar en til annars liðs í ensku úrvalsdeildinni.

„Ég hef rætt þetta oft og mörgum sinnum við Luis og auðvitað er ég að reyna að sannfæra hann um að vera áfram hjá okkur," sagði Steven Gerrard við Liverpool Echo.

„Ef við missum hann þá verður þetta þeim mun erfiðara fyrir okkur í Liverpool. Það er bara svo einfalt," sagði Gerrard.

„Ef náum í nokkra sterka leikmenn í viðbót og höldum Luis þá verðum við samkeppnishæfir í vetur. Það yrðu okkar bestu kaup í sumar að ná að halda Luis," sagði Gerrard.

„Ef hann fer til Arsenal þá verður tímabilið vissulega miklu erfiðara fyrir okkur. Það er samt ekkert vit í því að selja hann þangað og þá skiptir engu hversu miklir peningar eru á borðinu," sagði Gerrard og bætti við:

„Ég myndi skilja það ef hann væri að fara til Real Madrid eða Barcelona. Hann er frá Suður-Ameríku og það er pressa á honum frá fjölskyldunni að spila þar. Ef ég væri Luis þá myndi ég bíða eftir þessum liðum því ég veit að hann er nógu góður til að spila með Real eða Barca," sagði Gerrard.