Rodgers íhugar að færa Suárez aftar á völlinn

Brendan Rodgers, knattspyrnustjóri Liverpool, leitar nú leiða til þess að koma Daniel Sturridge inn í liðið sitt með sem bestum árangri en Liverpool keypti Sturridge frá Chelsea í vikunni fyrir tólf milljónir punda.

Luis Suárez hefur skorað fimmtán deildarmörk á tímabilinu og er aðeins einu marki á eftir Robin van Persie en samt lítur út fyrir það að Rodgers færi hann aftar á völlinn svo að Daniel Sturridge geti spilað í stöðu fremsta sóknarmanns.

„Ekki tala um að það sé vandamál að fá inn góða leikmenn. Við þurfum góða leikmenn. Ég hef talað mikið við Luis um þetta og það hefur verið stefnan að kaupa framherja í marga mánuði. Luis spilaði fyrir aftan framherjann hjá Ajax og ég hef ekki áhyggjur af því að hann njóti sína ekki aftar á vellinum. Hann er heimsklassa leikmaður," sagði Brendan Rodgers við Guardian.

„Besta staðan hans Daniels er að spila sem fremsti maður og 4-3-3 leikerfið okkar verður enn öflugra og fjölbreyttara með að fá slíkan mann inn. Það er hægt að hafa einn fremstan og tvo með honum á köntunum en þessi fremsti getur verið fljótandi nía eins og Luis Suárez eða beinskeyttur leikmaður eins Daniel Sturridge. Daniel nýtur sín best fyrir miðju marki þar sem hann getur nýtt best hraðann sinn," sagði Rodgers.