Wenger: Voru ekki erfiðari en Everton eða Southampton

Arsene Wenger, stjóri Arsenal, segir að Manchester City hafi ekki verið ósigrandi í dag þrátt fyrir 6-3 sigur síðarnefnda liðsins.

Arsenal heldur toppsæti sínu í deildinni þrátt fyrir tapið en niðurstaðan er engu að síður mikil vonbrigði fyrir Wenger.

„Það sem er sárast er að við fengum í dag tækifæri til að komast níu stigum á undan City. Munurinn er nú þrjú stig og það er erfitt að kyngja því,“ sagði Wenger við blaðamenn eftir leikinn.

„En City var ekki ósigrandi í dag. Þeir sköpuðu okkur ekki fleiri vandamál en Everton og Souhampton gerðu,“ bætti hann við.

„Við vorum með bestu vörn deildarinnar og fengum mörg mörk á okkur í dag. En í sannleika sagt hefðum við líka getað skorað sex mörk.“