Óvíst hvenær Van Persie spilar aftur

David Moyes, stjóri Manchester United, segir að nárameiðsli Robin van Persie séu ekki alvarleg en að enn sé óvitað hvenær hann geti spilað á nýjan leik.

Van Persie missti af leik United gegn Everton í gærkvöldi en síðarnefnda liðið hafði þá betur, 1-0.

Í fjarveru hans hefur United aðeins fengið tvö stig í síðustu þremur leikjum sínum og eru nú tólf stigum á eftir toppliði Arsenal. Van Persie spilaði síðast gegn Arsenal og skoraði þá sigurmark leiksins.

Moyes útilokaði ekki að Hollendingurinn verði með United þegar að liðið mætir Newcastle um helgina. „Við höfum verið að reyna að fá hann til baka síðustu vikurnar. Hann er ekki tilbúinn í dag þrátt fyrir að meiðslin séu ekki alvarleg.“+

United verður án Wayne Rooney um helgina þar sem hann fékk sína fimmtu áminningu á tímabilinu í gær. Hann verður því í leikbanni.