Stjórnvöld í Líbíu heimta útskýringar

Stjórnvöld í Líbíu hafa óskað eftir skýringum frá bandarískum stjórnvöldum á handtöku þeirra á Abu Anas al-Libi. Maðurinn var handsamaður úti á götu fyrir utan heimili sitt skammt fyrir utan höfuðborgina Trípólí og fluttur beint úr landi. Samkvæmt fjölskyldu mannsins hafði hann verið frjáls ferða sinna í heimalandi sínu síðan hann sneri aftur þangað fyrir þremur árum.

Líbísk stjórnvöld segjast tilbúin til að lögsækja sjálf hvern þann sem búsettur er í landinu og skiptir þá engu máli um hvað hann er sakaður.

Al-Libi var ákærður af dómstólum í New York fyrir aðild sína að sprengingum í tveimur bandarískum sendiráðum árið 1998, annars vegar í Tansaníu og hins vegar í Kenía, þar sem yfir 220 manns fórust. Hann hafði verið á lista bandarísku alríkislögreglunnar, FBI, yfir eftirlýsta hryðjuverkamenn síðan listinn var gefinn út eftir hryðjuverkaárásirnar á Bandaríkin 11. september 2011.

Handtaka al-Libi var önnur tveggja af hálfu bandarískra sérsveita í Afríku á laugardaginn. Í Sómalíu reyndu liðsmenn bandaríska sjóhersins að handsama annan grunaðan hryðjuverkamann. Eftir skotbardaga komst maðurinn undan.

Talið er að um hafi verið að ræða Mukhtar Abu Zubeyr, leiðtoga hryðjuverkasamtakanna Al-Shabab í Sómalíu. Hann lýsti árásinni á verslunarmiðstöð í Naíróbí í Kenía á hendur sér en þar voru að minnsta kosti 67 drepnir.

Al-Shabab hefur átt í samstarfi við al-Kaída og hafa bæði hryðjuverkasamtökin verið með starfsemi í Sómalíu.

„Við vonum að þetta sýni fólki að Bandaríkin muni aldrei hætta að leita þeirra sem eru grunaðir um hryðjuverk,“ sagði John Kerry, utanríkisráðherra Bandaríkjanna, um aðgerðirnar tvær á laugardaginn. „Meðlimir al-Kaída og annarra hryðjuverkasamtaka geta hlaupið en þeir geta ekki falið sig.“