Ég kvarta ekki yfir tímasetningu

Enski boltinn um helgina hefst með látum því í hádeginu tekur Man. City á móti toppliði Arsenal í stórleik helgarinnar.

Arsenal er með fimm stiga forskot á toppnum en City er í fjórða sæti sex stigum á eftir Lundúnaliðinu. Þrjú stig eru því afar mikilvæg fyrir City í dag. Með sigri verður liðið aðeins þrem stigum á eftir Arsenal og galopnar toppbaráttuna í leiðinni.

Það er svo sannarlega ekki verið að auðvelda verkefnið fyrir Arsenal. Liðið spilaði síðdegisleik síðasta sunnudag, var að spila á Ítalíu í Meistaradeildinni á miðvikudag og á nú hádegisleik á laugardegi.

Mikel Arteta, miðjumaður Arsenal, vældi yfir þessu álagi í gær en Arsene Wenger, stjóri liðsins, lítur málið aftur á móti björtum augum.

„Það er gott tækifæri fyrir okkur að byrja helgina vel og setja pressu á andstæðingana. Ég kvarta ekki yfir tímasetningu leikja og við notum það ekki sem afsökun. Vissulega er lítill tími til að æfa og í raun bara endurheimt fram að leik en þannig er það bara,“ sagði hinn jákvæði Wenger.

Lið City er talsvert miklu dýrara en lið Arsenal en Wenger segir sinn hóp samt alls ekkert vera síðri.

„City er með mjög sterkan hóp en þegar ég horfi á minn hóp þá öfunda ég ekki City. Við erum með fleiri skapandi og fjölhæfari leikmenn. Það er auðveldara fyrir mig að gera breytingar á liðinu. City fór aðra leið en Arsenal en okkar stefna er að skila stöðugleika og árangri.“