Önnur prófraun fyrir Martinez

Roberto Martinez og lið hans, Everton, freistar þess um helgina að fylgja eftir góðum útivallarsigri á Manchester United í vikunni með því að leggja topplið Arsenal í Lundúnum. Everton er eina lið deildarinnar sem hefur tapað færri leikjum á tímabilinu en Arsenal og er nú taplaust í rúma tvo mánuði.

Arsenal vann 2-0 sigur á Hull í vikunni en Daninn Nicklas Bendtner skoraði fyrra mark leiksins í sínum fyrsta leik í byrjunarliði í rúm tvö ár. Olivier Giroud er þó klár í slaginn á ný eftir að hann var hvíldur í vikunni og því líklegt að Bendtner þurfi að bíða færis á bekknum á morgun.

Boltaveisla helgarinnar byrjar í hádeginu í dag þegar að Manchester United tekur á móti Newcastle. Bæði lið töpuðu í vikunni og mistókst því að koma sér í hóp sex efstu liða deildarinnar. Liðin mega varla við því að gefa meira eftir í toppbaráttunni og því mikið undir í dag.

Chelsea og Manchester City, næstu lið á eftir Arsenal, eiga þá bæði erfiða útleiki fyrir höndum.

Liverpool tekur á móti West Ham á heimavelli þar sem augu flestra munu sjálfsagt beinast að framherjanum Luis Suarez sem skoraði fjögur mörk og lagði það fimmta upp í 5-1 sigri sinna manna á Norwich í vikunni.

Tottenham, lið Gylfa Þórs Sigurðssonar, mætir botnliði Sunderland en sigur liðsins á Fulham í vikunni var sá fyrsti síðan í lok október í deildinni. Gylfi Þór kom ekkert við sögu í leiknum en fær vonandi tækifærið á Leikvangi ljóssins í dag.