Saksóknari í Berlusconi-málinu fékk byssukúlur í pósti

Ítalski saksóknarinn Ilda Boccassini fékk tvær byssukúlur sendar á skrifstofuna til sín í umslagi og er talið að um alvarlega líflátshótun sé um að ræða. Boccassini sótti dómsmál gegn Silvio Berlusconi, fyrrverandi forsætisráðherra Ítalíu, en sá var ákærður fyrir að hafa haft kynmök við sautján ára gamla stúlku í svokallaðri Bunga-Bunga veislu.

Embættinu hafa borist fjölmargar líflátshótanir vegna málsins en steininn tók úr í gær þegar Boccassini fékk kúlurnar sendar í pósti. Saksóknarinn hefur farið fram á sex ára fangelsi yfir stjórnmálamanninum auk þess sem honum verði bannað að sinna opinberum störfum.

Berlusconi, sem er 76 ára gamall, hefur þegar verið dæmdur í fjögurra ára fangelsi svik. Að auki hefur honum verið meina að sinna opinberum störfum í fimm ár. Hann hefur áfrýjað þeim dómi til hæstaréttar á Ítalíu. Dómur verður hinsvegar kveðinn upp í kynferðisbrotamálinu 24. júní næstkomandi.