Mourinho ætlar ekki að breyta leikstíl Chelsea

Það gustar aðeins um Jose Mourinho, stjóra Chelsea, þessa dagana enda hefur gengi Chelsea-liðsins ekki verið upp á það best. Liðið hefur fengið á sig sex mörk í síðustu tveimur leikjum og spurningar um varnarleik liðsins hafa vaknað í kjölfarið.

Þrátt fyrir lekann í vörninni ætlar Mourinho ekki að breyta leikstíl liðsins og fara að verjast meira.

"Ætla ég að breyta og koma inn með fleiri varnarmenn? Nei. Ætla ég að spila David Luiz fyrir framan vörnina? Nei. Ætla ég að spila fjóra plús tvö og skilja Torres eftir einan frammi, reyna að sækja hratt og vinna 1-0? Nei," sagði Mourinho fyrir leikinn gegn Steaua Búkarest í Meistaradeildinni í kvöld.

"Við förum sömu leið og við höfum verið að gera. Við erum að skapa færin en þurfum að fara að nýta þau og klára andstæðinginn almennilega.

"Þið hlæjið kannski en ef við myndum æfa varnarleik í hornum gegn dúkkum þá myndi ein dúkkan örugglega skora. Öll fráköst falla til andstæðinganna og dúkkurnar myndu fá þau líka."