Rodgers: Man. Utd er tíu leikmönnum frá því að vinna titilinn

Sir Alex Ferguson, fyrrum stjóri Man. Utd, er búinn að ergja marga með því sem hann segir í nýútkominni ævisögu sinni. Þar dregur kallinn hvergi undan.

Hann skýtur meðal annars hressilega á Liverpool. Segir að liðið sé einum átta leikmönnum frá því að vinna Englandsmeistaratitil.

Þau ummæli líta ekki nógu vel út í augnablikinu þar sem Liverpool hefur gengið vel í upphafi tímabilsins á meðan það gengur hvorki né rekur hjá Man. Utd.

Brendan Rodgers, stjóri Liverpool, var eðlilega spurður út í þessi ummæli og hann svaraði þeim á léttu nótunum.

"Það er tveim minna en þeir þurfa. Ef við þurfum átta leikmenn til þess að vinna titilinn þá þurfa þeir tíu," sagði Rodgers.

Ferguson segir einnig í bókinni að hann hafi verið hissa á ráðningu Rodgers þar sem hann sé aðeins 39 ára gamall. Fergie gerði einnig lítið úr Steven Gerrard, fyrirliða Liverpool, sem hann sagði aldrei hafa átt neitt í Roy Keane og Paul Scholes.