Pellegrini: Man City er með besta hópinn í ensku úrvalsdeildinni

Manuel Pellegrini, nýr knattspyrnustjóri Manchester City, hefur mikla trú á leikmannahópi sínum fyrir komandi tímabil en City hefur eytt meira en 90 milljónum punda í sumar í nýja leikmenn.

Manchester City keypti í sumar þá Fernandinho (Shakhtar Donetsk, 30 milljónir punda), Stevan Jovetic (Fiorentina, 22 milljónir), Alvaro Negredo (Sevilla, 20 milljónir) og Jesus Navas (Sevilla, 14,9 milljónir).

„Ég held að við séum með besta leikmannahópinn í Englandi. Við vorum með gott lið fyrir og þessir fjórir leikmenn hafa bætt leikmannahópinn enn frekar," sagði Manuel Pellegrini.

„Ég vona að okkur takist að vinna fyrsta leikinn á móti Newcastle á heimavelli og við ætlum að reyna að koma með fleiri bikara hingað," sagði Pellegrini sem tekur við City-liðinu af Roberto Mancini.