Wenger: Út í hött að tala um titilinn núna

Arsene Wenger, knattspyrnustjóri Arsenal, er að gera frábæra hluti með liðið en Arsenal er með tveggja stiga forskot á Liverpool og Tottenham á toppi ensku úrvalsdeildarinnar eftir leiki helgarinnar.

Wenger hefur mátt þola harða gagnrýni síðustu ár enda félagið titlalaust síðan 2005 en þessi frábæra byrjun á þessu tímabili hefur heldur betur boðið annars konar umræðu heim.

„Við viljum að það sé rétt jafnvægi á milli metnaðar og hógværðar. Það er út í hött að tala um titilinn núna," sagði Arsene Wenger við Sky Sports en það eru aðeins búnar sex umferðir af 38.  Wenger hafði engar áhyggjur þótt að Arsenal-liðið hafi tapað á móti Aston Villa á dögunum en þá fóru ensku fjölmiðlarnir á flug í að afskrifa Arsene og Arsenal-liðið.

„Fólk gleymir  því að við erum búnir að vera á mjög góðu skriði síðan í mars og höfðum fyrr þann  leik ekki tapað einum einasta leik. Villa var bara eini tapleikurinn okkar í síðasta 21 leik liðsins," sagði Wenger.

Franski stjórinn segir að þetta tap á móti Villa í bland við það að hann var ekki búinn að kaupa nýja leikmann og að félagið hafi verið titlalaust í svo langan tíma hafi magnað upp viðbrögðin í fjölmiðlum. Nú nokkrum vikum síðar er ástandið hinsvegar allt annað og fjölmiðlar tala nú upp Arsenal-liðið í stað þess að tala það niður.

Arsenal er búið að vinna 5 af fyrstu 6 leikjum sínum í ensku úrvalsdeildinni og alla þrjá leiki sína frá því að Þjóðverjinn Mesut Özil kom inn í liðið. Markatala Arsenal í þessum sex leikjum er 13-7.

Það er hægt að sjá svipmyndir frá sigri Arsenal á Swansea um helgina með því að smella hér fyrir ofan.