Lukaku með tvö mörk í sigri Everton

Romelu Lukaku, lánsmaður frá Chelsea, skoraði tvö mörk og lagði upp eitt þegar Everton vann 3-2 heimasigur á Newcastle á Goodison Park í lokaleik 6. umferðar ensku úrvalsdeildarinnar í kvöld. Everton var 3-0 yfir í hálfleik en gestirnir frá Newcastle settu spennu í leikinn með tveimur mörkum í seinni hálfleik.

Everton er eina ósigraða lið deildarinnar (3 sigrar, 3 töp) og komst upp fyrir Chelsea og í 4. sætið með þessum sigri. Newcastle er aftur á móti í 16. sætinu með 7 stig.

Romelu Lukaku kom Everton í 1-0 strax á 5. mínútu eftir sendingu frá Kevin Mirallas og  Lukaku lagði síðan upp annað mark Everton fyrir Ross Barkley á 25. mínútu. Hinn ungi Ross Barkley átti mjög góðan leik og er vaxandi stjarna í enska boltanum.

Romelu Lukaku skoraði síðan þriðja markið á 37. mínútu eftir að varnarmenn Newcastle misstu klaufalega af löngu útsparki markvarðarins Tim Howard.

Lukaku skoraði reyndar tvö mörk til viðbótar í fyrri hálfleik en þau voru bæði dæmd af vegna rangstöðu. Everton var 3-0 yfir í hálfleik.

Yohan Cabaye minnkaði muninn á 51. mínútu með frábæru skoti og það var allt annað að sjá til Newcastle-liðsins í seinni hálfleik.

Loïc Remy skoraði annað mark Newcastle á 89. mínútu þegar hann var sterkari en Phil Jagielka í teignum og það var því mikil spenna í leiknum á lokamínútunum. Newcastle náði hinsvegar ekki að kóróna endurkomuna og Everton fagnað þremur stigum í húsi.  

Gareth Barry, miðjumaður Everton, lék sinn 500. leik í ensku úrvalsdeildinni í kvöld.