Deila ekki konum nema samkomulag liggi fyrir

Nýtt samkomulag liggur fyrir milli vélhjólagengjanna Bandidos og Hells Angels en í því má sjá meðal annars sjá að ekki eru það aðeins heilu bæjarfélögin sem klíkurnar deila.

DR Nyheder greinir frá þessu samkomulagi milli Bandidos og Hells Angels í Danmörku en það er í 25 liðum og mun vera að finna á heimasíðum gengjanna.

Þar er eitt og annað forvitnilegt að finna. Til dæmis segir í 17. lið að algerlega sé bannað að eiga við kærustur, konur, fyrrverandi kærustur og fyrrverandi konur meðlima hins hins gengisins nema fyrir liggi samþykki af hálfu viðkomandi; að konum sé deilt. Þetta atriði skal miðast við heilbrigða skynsemi hverju sinni.

Þá er lagt blátt bann við því að meðlimir hvors gengis um sig sláist sín á milli og hefur verið komið upp sérstakri símaþjónustu, "hot line", þar sem tekið er á slíkum álitaefnum, þegar svo ber undir og bráð nauðsyn kallar á.

Samkomulagið er tímabundið og tvisvar á ári koma 10 til 12 fulltrúar hvorra samtaka um sig saman á formlegum fundi og fara yfir samkomulagið til að það megi vera sem best úr garði gjört og þannig undirstaða friðar milli gengjanna tveggja.