Gylfi fékk ekki margar mínútur í sigri Tottenham

Gylfi Þór Sigurðsson kom inná sem varamaður á 84. mínútu þegar Tottenham vann 2-1 útisigur á Sunderland í kvöldleiknum í ensku úrvalsdeildinni. Þetta var mjög mikilvægur sigur fyrir knattspyrnustjórann André Villas-Boas sem hefur fengið mikla gagnrýni að undanförnu.

Sigurmark Tottenham var slysalegt sjálfsmark John O'Shea á 50. mínútu leiksins þegar sending Mousa Dembele fór af honum og í markið en Sunderland komst í 1-0 í leiknum.

Tottenham fékk góð færi til að bæta við mörkum eftir þetta og Jermain Defoe átti sem dæmi tvö skot í stöngina.

Þetta var annar deildarsigur Tottenham í röð og kemur liðinu upp í sjötta sæti deildarinnar sjö stigum á eftir toppliði Arsenal en aðeins þremur stigum eftir Liverpool sem er í 2. sætinu.

Adam Johnson kom Sunderland í 1-0 á 37. mínútu með góðu skoti úr teignum eftir að Hugo Lloris misreiknaði fyrirgjöf.

Brasilíumaðurinn Paulinho jafnaði metin sex mínútum síðar þegar hann potaði boltanum í netið eftir að Nacer Chadli skallaði langa aukaspyrnu inn í markteiginn.

Gylfi Þór Sigurðsson hefur verið út í kuldanum að undanförnu og fékk fáar mínútur til að koma sér inn í leikinn. Hann var þó einu sinni nálægt því að komast í gott skotfæri í teignum en missti boltann frá sér.