Moyes: Við verðum bara að halda áfram

David Moyes, knattspyrnustjóri Manchester United, horfði upp á sína menn tapa öðrum heimaleiknum á aðeins fjórum dögum þegar liðið tapaði 0-1 á móti Newcastle á Old Trafford í ensku úrvalsdeildinni í fótbolta í dag.

„Þetta hefði getað verið miklu betra hjá okkur. Okkur vantaði mark til að fá sjálfstraustið. Við hefðum líka geta gert betur í markinu þeirra og það breytti leiknum," sagði David Moyes við BBC. United tapaði 0-1 á móti Everton á miðvikudagskvöldið.

„Við sköpuðum ekki nóg en við vorum samt að fá einhver færi. Þegar lið er ekki að skora þá þurfa hlutirnir að falla með því. Það gerðist ekki í dag," sagði Moyes.

„Við reynum að vinna næsta leik. Við verðum bara að halda áfram. Við getum ekki hugsað lengra en að reyna að vinna næsta leik," sagði Moyes.