„Liverpool getur orðið Englandsmeistari“

Jose Mourinho segir að tiltölulega lítið álag á leikmenn Liverpool geri það að verkum að liðið geti staðið uppi sem sigurvegari í ensku úrvalsdeildinni í vor.

Portúgalinn sat fyrir svörum á blaðamannafundi í gær fyrir leik Chelsea og Liverpool á morgun. Stjóri Lundúnaliðsins var spurður að því hvort hann teldi Liverpool eiga möguleika á titlinum.

„Þeir eru ekki í eldlínunni í Meistaradeildinni og ekki einu sinni Evrópudeildinni,“ sagði Mourinho. Gæðin í liðinu, metnaðurinn auk fyrrnefndrar staðreyndar geri að verkum að þeir rauðklæddu eigi möguleika.

Mourinho bendir á að leikmenn Liverpool gætu leikið allt að tuttugu leikjum minna á leiktíðinni en leikmenn Chelsea, Manchester United, Arsenal og Manchester City.

„Þessir leikmenn munu spila 60 leiki á meðan Liverpool spilar 40 leiki. Munurinn er mikill,“ sagði Mourinho. Brendan Rodgers hafi viku hverju sinni til að undirbúa lið sitt fyrir leik. Það sé mikið forskot.