Suarez: Ég er hamingjusamur hjá Liverpool

Luis Suarez er sæll og glaður sem leikmaður Liverpool og vill hvergi annars staðar vera.

Framherjinn umdeildi hefur blásið á orðróm þess efnis að hann sé á leiðinni til Real Madrid í félagaskiptaglugganum. Hann segist ánægður hjá Rauða hernum.

„Ég kannast ekkert við áhuga frá Real Madrid og ég nýt mín hjá Liverpool,“ sagði Suarez við Sport 890 útvarpsstöðina í Úrúgvæ.

„Það er mikil spenna í hópnum og tilhlökkun til góðrar leiktíðar. Við höfum verið í toppbaráttunni hingað til og horfum til toppsins. Gengið er gott og við getum vel trúað því að efsta sætið verði okkar.“

Suarez angraði margan stuðningsmann Liverpool í sumar með eilífum yfirlýsingum um framtíð sína. Margir snerust gegn honum en hann virðist hafa snúið ansi mörgum með frábærri frammistöðu á leiktíðinni.

„Mér finnst ég hluti af góðum hlutum hjá Liverpool. Mér líður vel og er hamingjusamur. Ég legg hart að mér fyrir félagið og verð alltaf þakklátur félaginu og liðsfélögunum.“