Wenger: Ekki spyrja mig, spyrjið frekar dómarana

Arsene Wenger, knattspyrnustjóri Arsenal, notaði blaðamannafundinn í gær til þess að setja pressu á dómarann Michael Oliver sem verður með flautuna í stórleik Manchester United og Arsenal á Old Trafford á morgun.

Wenger grínaðist meðal annars með það að það yrði núna auðveldara fyrir dómarana að dæma á Manchester United á Old Trafford af því að Sir Alex Ferguson er ekki lengur á hliðarlínunni.

Wenger var spurður út í það hvernig það yrði að spila á Old Trafford nú þegar Ferguson er ekki með lið United. „Ekki spyrja mig að því, spyrjið frekar dómarana," svaraði Arsene Wenger í léttum tón.  

Wenger tók það samt strax fram að hann búist ekki við öðruvísi dómgæslu nú þegar David Moyes er tekinn við liði Manchester United.

„Ég býst alltaf við góðri dómgæslu og mæti aldrei með mótaðar skoðanir á dómaranum. Það er líka alltaf pressa á dómarana á Old Trafford frá áhorfendunum. Þetta er undir dómaranum sjálfum komið að taka réttar ákvarðanir, passa upp á leikmenn og dæma aukaspyrnur þegar það á við," sagði Wenger.