Sérstök sæti fyrir söngvara á Old Trafford

Áhorfendur á Old Trafford, heimavelli Man. Utd, þykja oft á tíðum ekki vera nógu háværir og við því ætlar félagið að bregðast.

Mörgum er eflaust í fersku minni er Roy Keane, fyrrum fyrirliði liðsins, lét stuðningsmenn heyra það með frægum rækjusamlokuummælum.

Nú hefur félagið ákveðið að taka frá 1.400 sæti í stúkunni sem er ætlað fyrir söngvara eða fólk sem vill láta almennilega í sér heyra og ná öðrum á sitt band.

Þetta verður gert í fyrsta skipti á leiknum gegn Real Sociedad í Meistaradeildinni þann 23. október.

Ársmiðahafar hafa forkaupsrétt á þessum sætum og verður áhugavert að sjá hvernig til tekst.