Chamakh tryggði Palace mikilvægan sigur

Tony Pulis er farinn að láta til sín taka hjá Crystal Palace og liðið komst upp úr botnsæti ensku úrvalsdeildarinnar í kvöld er það vann 1-0 sigur á West Ham.

Palace er í næstneðsta sæti deildarinnar, með sama stigafjölda og liðið fyrir ofan það í töflunni. West Ham er eftir sem áður í fimmtánda sæti.

Þetta var annar leikur liðsins undir stjórn gamla Stoke-stjórans, Pulis, og fyrsti sigurinn undir hans stjórn.

Það var fátt um færi í fyrri hálfleik en Kevin Nolan fékk besta færi West Ham í hálfleiknum. Þá vippaði Mark Noble boltanum yfir varnarvegginn í aukaspyrnu. Nolan lúrði fyrir aftan vegginn og í dauðafæri. Hann hitti boltann aftur á móti ekki vel.

Það var svo skömmu fyrir hlé sem enginn annar en Marouane Chamakh kom Palace yfir með óvæntu marki og Palace leiddi í hálfleik.

Það var hart barist, mikið hlaupið og djöflast en minna um færi í síðari hálfleik. Baráttuglaðir Palace-menn gáfu engin færi á sér og fögnuðu sætum sigri.