Mourinho: Sex lið geta unnið titilinn

Jose Mourinho, knattspyrnustjóri Chelsea, segir að það verði mikið undir í ensku úrvalsdeildinni á næstu tveimur mánuðum.

„Það er mikið í húfi bæði í desember og janúar. Þá sjáum við hvort eitthvað af efstu sex liðunum muni byrja að stinga hin liðin af,“ sagði Mourinho.

Þess má geta að meðal þeirra félaga sem ekki eru í hópi sex efstu sem stendur eru bæði Manchester United og Tottenham.

„Öll sex lið geta unnið titilinn en það er of snemmt að spá í hvort eitthvert þeirra sé sigurstranglegast.“

„Ég hef ávallt verið í efstu tveimur sætunum með mín lið og mér þætti óþægilegt að vera fyrir utan þann hóp,“ bætti Mourinho við en Chelsea er sem stendur í öðru sæti deildarinnar. „Það er enn mikið eftir.“

Arsenal er í efsta sæti deildarinnar en á eftir Chelsea koma Manchester City, Liverpool, Everton og Newcastle.