Fer Everton í Liverpool?

Daily Mail slær því upp í frétt á heimasíðu sinni í dag að Liverpool og Manchester United hafi bæði áhuga á því að næla í öflugan Brasilíumann sem hefur verið að spila mjög vel í heimalandinu á þessu tímabili.

Everton Ribeiro er 24 ára gamall miðjumaður hjá Cruzeiro sem var á föstudaginn kosinn knattspyrnumaður ársins í Brasilíu. Hann hjálpaði Cruzeiro að vinna brasilíska meistaratitilinn 2013.

Everton Ribeiro hefur ekki enn náð að spila fyrir brasilíska A-landsliðið en hann hefur spilað fyrir yngri landsliðin. Eftir útnefningu hans á föstudagskvöldið er mjög líklegt að hann fái fljótlega tækifæri hjá A-landsliðinu.

Brendan Rodgers, knattspyrnustjóri Liverpool, þarf að styrkja leikmannahópinn á Anfield og þá er pressa á David Moyes, knattspyrnustjóra Manchester United, að gera betur á leikmannamarkaðnum en síðasta sumar.

Everton Ribeiro gaf það beinlínis út í viðtölum í Brasilíu að hann ætli sér að komast að hjá sterku liði í Evrópu og það mátti heyra þar að Ribeiro væri spenntastur fyrir Manchester United.

Það yrði hinsvegar athyglisverð þróun mála ef að stuðningsmenn Liverpool syngdu lofsöngva um Everton á nýju ári.