Rodgers ósáttur við forsvarsmenn Cardiff og Spurs

„Eina skýring mín á þessu er sú staðreynd að þarna ræður ferðinni viðskipamaður sem hefur nákvæmlega enga þekkingu á fótbolta,“ segir Brendan Rodgers, knattspyrnustjóri Liverpool. Guardian fjallar um málið.

Norður-Íranum finnst framkoma eigenda Tottenham og Cardiff í garð stjóra sinna til skammar. Tottenham lét Andre Villas-Boas fara eftir átján mánuði í starfi á dögunum og flest bendir til þess að Malky MacKay hjá Cardiff fari sömu leið.

„Mér finnst þessi umræða um Malky með ólíkindum,“ segir Rodgers en þeim er vel til vina. Skotinn kom Cardiff upp í úrvalsdeildina í fyrra og einnig í úrslit deildarbikarsins er liðið spilaði í b-deildinni.

Eigandi Cardiff, Vincent Tan, á að hafa sent skoska stjóranum tölvupóst og sett honum stólinn fyrir dyrnar. Annaðhvort segi hann sjálfur upp eða verði rekinn.

„Hann á eftir að verða stjóri hjá stóru félagi og mér finnst ótrúlegt að það sé einu sinni til umræðu að láta hann fara.“

Cardiff situr í 15. sæti deildarinnar fjórum stigum frá fallsæti.

Rodgers segir að sér hafi staðið til boða að taka við liði Tottenham sumarið 2012. Hann hafi valið Liverpool fram yfir Lundúnafélagið eftir að hafa skoðað hve lítinn tíma stjórar Tottenham fengju með liðið.

„Það munaði mjóu. Þeir eru glæsilegt félag og ég horfði meðal annars til sögu þeirra. Þeir höfðu hins vegar verið með 11 stjóra undanfarin átján ár þannig að það var ekki málið fyrir mann eins og mig. Ég vildi fara til félags þar sem tími fengist til uppbyggingar.“