Dómarinn hefur alltaf haft rétt fyrir sér

Ashley Young, leikmaður Man. Utd, er einn óvinsælasti leikmaðurinn í enska boltanum. Hann þykir falla allt of auðveldlega og er ítrekað sakaður um leikaraskap.

Sir Alex Ferguson, fyrrum stjóri Man. Utd, var alltaf þekktur fyrir að verja sína menn fram í rauðan dauðann en meira að segja hann gagnrýndi Young í fyrra fyrir að dýfa sér.

Leikmaðurinn sjálfur er ekkert að velta sér upp úr áliti annarra.

"Þetta snýst um dómarana. Þeir taka ákvarðanir í leikjum. Starf þeirra er mjög erfitt en mér finnst þeir alltaf hafa dæmt rétt þegar ég er annars vegar," sagði Young en óhætt er að segja að ekki séu allir sammála honum þar.

"Ég fylgist ekki með fyrirsögnum og umræðum. Það hafa samt allir rétt á sinni skoðun. Ég lít á þetta þannig að dómarar taka sína ákvörðun í leikjum og lengra nær það ekki. Auðvitað er búið að ræða mín málefni innan félagsins en ég tjái mig ekki um það. Það er innanhússmál."