Ég er búinn að spila eins og meðalmaður

Miðjumaður Man. Utd, Tom Cleverley, hefur nú viðurkennt það sem allir vita. Að frammistaða hans í vetur hafi verið í meðallagi.

Enski landsliðsmaðurinn hefur verið harðlega gagnrýndur fyrir frammistöðu sína í vetur enda hefur hann engan veginn staðið undir væntingum.

"Eins og staðan er þá líður mér eins og ég hafi upp á meira að bjóða. Ég hef átt nokkra miðlungsleiki, reyndar fleiri en ég kæri mig um að eiga," sagði Cleverley.

"Á sama tíma í fyrra var ég að detta í mitt besta form. Það hentar mér vel að spila mikið og hafa stutt á milli leikja. Þá kemst taktur í spilið hjá mér."

Það er pressa á stráknum enda þolinmæði margra stuðningsmanna í hans garð orðin ansi lítil.