Öruggt hjá Manchester United í Birmingham

Manchester United skellti Aston Villa 3-0 á Villa Park í Birmingham í ensku úrvalsdeildinni í fótbolta í dag. United var 2-0 yfir í hálfleik og var sigurinn í senn þægilegur og öruggur. Darren Fletcher snéri aftur á völlinn í seinni hálfleik.

Aston Villa byrjaði leikinn betur og var hættulegt í sínum aðgerðum en það var Danny Welbeck sem skoraði tvö mörk fyrir Manchester United á þriggja mínútna kafla áður en 20 mínútur voru liðnar af leiknum.

Á 15. mínútu átti Rafael frábæra fyrirgjöf á Januzaj sem skallaði fast í stöngina en þaðan fór boltinn til Welbeck sem gerði mjög vel í að stýra boltanum í netið.

Á 18. mínútu sendi Welbeck á Valencia sem sendi fyrir frá hægri þangað sem Welbeck var mættur til að senda boltann í samskeytin og inn. Tvö glæsileg mörk hjá Welbeck sem gerðu í raun út um leikinn á augabragði.

Hafi Aston Villa átt einhverja von í upphafi seinni hálfleiks þá hvarf hún þegar Tom Cleverley kom Manchester United í 3-0 á 52. mínútu.

Darren Fletcher snéri aftur á völlinn þegar hann kom inn á sem varamaður á 70. mínútu en hann þjáðist af sáraristilsbólgu og hefur glímt við það síðustu tvö árin.

Sigur Manchester United var öruggur og hefði hæglega getið orðið enn stærri því liðið fékk fjölda færa sem liðið nýtti ekki.

Manchester United lyfti sér upp í 8. sætið með sigrinum og upp fyrir Southampton en Aston Villa er í 11. sæti.