Wilshere sýndi löngutöng og gæti farið í bann

Jack Wilshere, leikmaður Arsenal, er líklega búinn að koma sér í klandur hjá enska knattspyrnusambandinu.

Arsenal tapaði í dag fyrir Manchester City, 6-3, í toppslag ensku úrvalsdeildarinnar. Eftir leik virtist hann óánægður með framferði stuðningsmanna City og sýndi þeim útrétta löngutöng.

Arsene Wenger, stjóri Arsenal, viðurkenndi að þetta gæti haft sínar afleiðingar fyrir Wilshere. „Við verðum að taka því ef hann gerði þetta og verður dæmdur í bann,“ sagði Wenger. „Ég veit ekki hvort hann gerði þetta.“

Luis Suarez, leikmaður Liverpool, fékk sekt og eins leiks bann fyrir samskonar atvik árið 2011.