Rooney: Þurfum að leika betur

Wayne Rooney framherji Englandsmeistara Manchester United segir liðið þurfi að gera betur og fara að leika eins og meisturum sæmir eftir slakt gengi og slaka frammistöðu það sem af er tímabilinu.

Manchester United hefur tapað tveimur síðustu leikjum sínum en liði mætir Aston Villa á útivelli klukkan 13:30 í dag í beinni útsendingu á Stöð 2 Sport 2.

„Við verðum allir að leika betur,“ sagði Rooney við fjölmiðla í aðdraganda leiksins í dag. „Við höfum ekki leikið nógu vel og nú þurfum við að stíga fram og sýna af hverju við urðum meistarar á síðustu leiktíð og gera betur.

„Við eigum nokkra leiki núna sem við eigum að geta unnið og vonandi gerum við það.“

Rooney hefur verið ljósið í myrkrinu hjá Manchester United það sem af er tímabilinu. Hann hefur skorað 10 mörk og leikið frábærlega.

„Þetta snýst ekki um mig. Þetta snýst allt um liðið. Ef liðinu gengur ekki vel þá skiptir ekki máli hvernig ég leik. Við þurfum að gera betur sem lið, bretta upp ermar og leika betur.

„Við þurfum að horfa raunsætt á stöðuna, rífa okkur upp töfluna og sjá hvar við verðum eftir fjóra, sex eða átta leiki,“ sagði Rooney en Manchester United er í 9. sæti þegar flautað verður til leiks í dag, þremur stigum á undan Aston Villa.

„Þetta er ekki gott. Við erum allt stoltir leikmenn og okkur líður ekki vel í þessari stöðu. Þetta er sárt og vonandi munum við bregðast við á réttan hátt.

„Við höfum ekki leikið eins vel og við getum og nú þurfum við að bæta úr því. Það eru margir leikir eftir og mörg  stig í pottinum.“