Fimm hafa fengið að taka pokann sinn á fjórum mánuðum

Þótt leiktíðin í ensku úrvalsdeildinni sé ekki hálfnuð hafa fimm af tuttugu félögum deildarinnar séð ástæðu til þess að reka knattspyrnustjórann sinn. Andre Villas-Boas, stjóri Tottenham, var rekinn í morgun.

Paolo Di Canio var fyrstur rekinn í september eftir skelfilega byrjun Sunderland á leiktíðinni. Ítalinn var afar illa liðinn hjá leikmönnum félagsins sem virtist hafa sitt að segja um ákvörðun stjórnarinnar að losa sig við hann.

Í kjölfarið fylgdi brottvikning Ian Holloway hjá Crystal Palace og svo Martin Jole sem var rekinn frá Fulham á dögunum. Á tveimur sólarhringum hafa svo skapast tvö starfstækifæri í deildinni. Steve Clarke var rekinn frá West Brom á laugardaginn eftir fjóra tapleiki í röð. Loks kom að Villas-Boas hjá Tottenham í morgun eftir 5-0 tapið gegn Liverpool um helgina.

Paolo Di Canio (Sunderland)

Ian Holloway (Crystal Palace)

Martin Jol (Fulham)

Steve Clarke (West Brom)

Andre Villas-Boas (Tottenham)