Zola hættur hjá Watford

Gianfranco Zola hætti í dag sem knattspyrnustjóri Watford en enskir miðlar greina frá þessu. Zola hefur stýrt málum á Vicarage Road síðan í júlí 2012.

„Þetta er engin skyndiákvörðun. Ég verð að setja Watford Football Club í fyrsta sæti og þess vegna tók ég þessa ákvörðun," er haft eftir Gianfranco Zola í fréttatilkynningu. Hann stýrði áður West ham United frá september 2008 til maí 2010.

„Það er það besta fyrir félagið að finna einhvern annan stjóra að ná þeim árangri sem mér dreymdi um að ná og lagði mikla vinnu á mig til að uppskera," sagði Zola ennfremur í tilkynningunni frá Watford.

Watford er í þrettánda sæti í ensku b-deildinni og hefur ekki unnið í síðustu níu leikjum sínum. Liðið varð í fjórða sæti í lok september en hefur síðan aðeins náð í 7 stig í ellefu deildarleikjum.

Liðið var hársbreidd frá því að komst upp í ensku úrvalsdeildina síðasta vor en sat þá eftir í úrslitakeppninni.

Fyrr í dag var André Villas-Boas rekinn frá Tottenham og menn eru fljótir að leggja saman tvo og tvo og farnir að spá því að Ítalinn verði næsti knattspyrnustjóri Gylfa Þórs Sigurðssonar.

Zola hefur hinsvegar ekki verið að ná góðum árangri með Watford á þessu tímabili og því er þetta eflaust bara óheppileg tímasetning.