Lítil stelpa neitaði að taka í hönd Suarez

Handabandavesenið hjá Luis Suarez og Patrice Evra gleymist seint. Suarez lenti í óvæntri handabandsuppákomu aftur um síðustu helgi.

Lítil stúlka, sem labbaði með leikmönnum inn á völlinn fyrir leik Spurs og Liverpool, neitaði þá að taka í hönd Suarez. Þess í stað setti hún höndina á nefið og gerði grín.

Það var ástæða fyrir þessari sérstöku hegðun stelpunnar. Pabbi hennar hafði nefnilega lofað henni um 4.000 kr. ef hún myndi stríða Suarez á þennan hátt.

"Suarez er ekki beint yndislegasta manneskja jarðarinnar þannig að ég vildi að hún gerði þetta. Þetta var samt bara létt grín og skemmtilegt," sagði faðirinn.

Það var þó Suarez sem hló síðastur því hann lék sér að leikmönnum Tottenham allan leikinn og átti stærstan þátt í 5-0 sigri liðsins.

Hér að ofan má sjá uppákomuna og tilþrif Suarez í leiknum.