Vidic labbar ekki aftur inn í United-liðið

David Moyes, knattspyrnustjóri Manchester United, hefur varað serbneska miðvörðinn Nemanja Vidic við því að fyrirliðinn labbi ekkert aftur inn í United-liðið nú þegar hann er búinn að ná sér að meiðslum.

Nemanja Vidic missti af tveimur síðustu leikjum liðsins eftir að hafa meiðst í deildarleik á móti Newcastle 7. desember síðastliðinn. United-liðið hefur haldið marki sínu hreinu í síðustu tveimur leikjum sínum án Serbans.

„Nemanja er að verða klár í slaginn. Við höfum hinsvegar fimm miðverði í hópnum. Við getum notað Phil Jones, Chris Smalling, Jonny Evans, Rio Ferdinand og svo hann. Það er samkeppni um stöður í liðinu og menn verða að spila vel til að halda sæti sínu," sagði David Moyes á blaðamannafundi fyrir deildarbikarleik á móti Stoke City annað kvöld.

Nemanja Vidic hefur leikið 11 af 16 deildarleikjum Manchester United á þessu tímabili og United-liðið hefur náð í 17 stig í þeim.