Ég hataði Gary Neville þegar ég hitti hann fyrst

Heimildarmyndin "The Class of '92" er að vekja mikla athygli en hún var frumsýnd í London á sunnudagskvöldið. Myndin fjallar um uppkomu sex ungra leikmanna í aðallið Manchester United í upphafi tíunda áratugar síðustu aldar og afar sigursæl ár sem fylgdu í kjölfarið.

Ben Smith, blaðamaður BBC, hitti þá David Beckam, Paul Scholes, Nicky Butt, Phil Neville, Gary Neville og Ryan Giggs og ræddi við þá um ýmislegt tengdum þessum sigursælu árum með Manchester United.

Hann spurði þá meðal annars um hvernig fyrstu kynni þeirra voru af hverjum öðrum og Nicky Butt var ekki mikið að skafa af hlutnum.

„Ég hataði Gary Neville þegar ég hitti hann fyrst. Við hittumst fyrst þegar ég mætti honum með Manchester boys á móti Bury boys. Það var þarna einn gæi í vörninni sem var góður fótboltamaður en hætti bara ekki að tala allan leikinn. Hann er eins í dag, hann talar endalaust," sagði Nicky Butt.

„Ég þoldi hann ekki og hreinlega hataði hann. Ég vildi tækla hann og sýna honum hversu góður ég var. Svo þegar við hittumst einn daginn á æfingavellinum þá small allt saman og við urðum bestu vinir. Hann er einn af mínum bestu vinum í dag," sagði Butt.

Það er hægt að sjá kvikmyndastiklu um myndina með því að smella hér fyrir neðan en hér er hægt að nálgast þessi skemmtilegu viðtöl Ben Smith við þá David Beckam, Paul Scholes, Nicky Butt, Phil Neville, Gary Neville og Ryan Giggs.