Mourinho vill að leikmenn taki sér Zlatan til fyrirmyndar

Jose Mourinho, stjóri Chelsea, segir óskandi að leikmenn bregðist við miklu álagi á samskonar máta og þeir Zlatan Ibrahimovic og Didier Drogba.

Chelsea vann tvo Englandsmeistaratitla undir stjórn Mourinho um miðjan síðasta áratug en þaðan fór hann til Inter sem hann gerði að þreföldum meisturum.

„Ég vil setja pressu á mína leikmenn en maður verður líka að vita hvað maður er með í höndunum. Ég setti til dæmis mikið á herðar Didier og þá var alltaf stutt í dýrið í honum,“ sagði Mourinho við enska fjölmiðla.

„Það nákvæmlega sama var upp á teningnum hjá Inter þegar að Zlatan var þar. Ég vissi hvað ég fengi úr honum þegar ég beitti hann miklum þrýstingi.“

„En þetta fer eftir hverjum og einum leikmanni. Sumir bregðast vel við en aðrir ekki. Leikmenn hafa stundum beðið mig um að gagnrýna þá ekki fyrir framan aðra leikmenn því það dregur úr sjálfstrausti þeirra.“

„Það er mikilvægt að það verði mönnum eðlislægt að berjast um titla. Það verður að vera jákvæð áskorun fyrir leikmenn - ekki neikvæð. Við erum með leikmenn hér sem hafa unnið titla en ekki í langan tíma. Þá vill það oft gleymast.“