Moyes tapaði gegn sínu gamla liði

David Moyes, stjóri Man. Utd, náði aldrei að vinna með Everton á Old Trafford en hann sá bláklædda vinna sinn fyrsta sigur þar í kvöld frá því árið 1992.

Það hefur eflaust verið mjög sérstök stund fyrir Moyes að mæta sínu gamla félagi þar sem hann stóð sig frábærlega. Stuðningsmenn Everton þökkuðu ekki fyrir heldur byrjuðu að láta hann heyra það strax í upphafi leiks.

Man. Utd fékk heldur betur tækifæri til þess að skora í fyrri hálfleik en líkt og oft áður í vetur gekk ekkert hjá liðinu að koma boltanum í netið.

Marouane Fellaini mátti þakka fyrir að hanga inn á vellinum er tíu mínútur lifðu leiks. Hann rak þá takkana á bólakaf í læri McCarthy.

Leikmenn Everton rifu sig upp eftir tæklinguna. Oviedo gleymdist í teignum er Lukaku átti misheppnað skot. Var einn á fjærstöng og setti boltann í klofið á De Gea.

Það reyndist vera eina mark leiksins og United er nú tólf stigum á eftir toppliði Arsenal.