Moyes sagður hrifinn af Everton

Manchester United og Liverpool virðast bæði hafa áhuga á að fá Brasilíumanninn Everton Ribeiro í sínar raðir.

Ribeiro er 24 ára miðvallarleikmaður sem er á mála hjá Cruzeiro í heimalandinu. Fjölmiðlar í Suður-Ameríku hafa greint frá því að útsendarar frá báðum félögum hafa fylgst náið með kappanum síðustu vikur.

Forráðamenn Cruzeiro hafa þó staðfest að félagið hafi ekki fengið nein tilboð í kappann enn sem komið er.

Umboðsmaður hans hefur þó sagt að hann sé í beinum samskiptum við Manchester United. „Everton Ribeiro var nýlega sagður vera besti leikmaður brasilísku deildarinnar. Manchester United hefur áhuga á honum. David Moyes finnst mikið til hans koma,“ sagði umboðsmaðurinn.

Ribeiro er samningsbundinn Cruzeiro til ársins 2016.