Pellegrini: Aguero er betri en Suarez

Flestir stjórar í ensku úrvalsdeildinni væru til búnir að skipta á sínum aðal sóknarmanni og Liverpool-framherjanum Luis Suarez en ekki Manuel Pellegrini, knattspyrnustjóri Manchester City.

Luis Suarez hefur verið mikið á milli tannanna á fólki eftir að hann skorað fernu á móti Norwich í vikunni og er Úrúgvæmaðurinn nú búinn að skora þrettán mörk og leggja upp fjögur í níu leikjum sínum á leiktíðinni.

„Suarez er mjög mikilvægur framherji en ég tel að Sergio taki meira þátt í leiknum," sagði Manuel Pellegrini á blaðamannafundi fyrir leik Manchester City og Southampton sem fer fram í dag. Sergio Aguero er næstmarkahæsti leikmaðurinn í ensku úrvalsdeildinni en hann hefur skorað tveimur mörkum minna en Luis Suarez.

„Sergio er bara 25 ára gamall og auðvitað tel ég hann geta bætt sig sem leikmann. Hann hefur sem dæmi bætt vinnusemi sína mikið á þessu ári. Sergio hefur alltaf verið toppleikmaður sem skorar mikið af mörkum. Núna er hann hinsvegar að vinna miklu meira fyrir liðið þegar hann er ekki með boltann sem er mikilvægt fyrir okkur," sagði Pellegrini.

Pellegrini veit ekki um betri leikmann í ensku úrvalsdeildinni en argentínska framherjann sinn og hrósar honum fyrir fjölhæfni sína.

„Ég sagði aldrei að Sergio væri besti framherjinn í ensku úrvalsdeildinni en ég sagði að hann væri besti leikmaðurinn. Það eru kannski til betri framherjar í deildinni en þeir eru ekki eins fullkomnir leikmenn og hann," sagði Pellegrini.