Mark með hendi tryggði Swansea stig | Myndband

Danny Graham skoraði gegn sínum gömlu félögum í Swansea er Hull náði í dýrmætt stig í Wales.

Nýliðar Hull sóttu mikilvægt stig í smiðju Swansea þegar liðin mættust í 15. umferð ensku úrvalsdeildarinnar í Wales í kvöld. Liðin skildu jöfn 1-1 í miðjumoðsslag.

Danny Graham, fyrrverandi framherji Swansea, kom gestunum á bragðið strax á 9. mínútu. Ashley Williams átti þá slæma sendingu úr vörn heimamanna og Hull brunaði í sókn. Ahmed El Mohamady sendi fyrir frá hægri á Graham sem afgreiddi boltann snyrtilega á fjærstöng.

Nýliðarnir héldu forystunni fram á 60. mínútu. Þá skoraði Chico Florez eftir fyrirgjöf frá Jonjo Shelvey. Spánverjinn stýrði boltanum í netið með hendinni en það fór framhjá Chris Foy, dómara leiksins.

Swansea var sterkari aðilinn í leiknum en tókst ekki að tryggja sér sigurinn. Swansea hefur 19 stig í 10. sæti en Hull 18 stig í 12. sæti.